Real Madrid, mesazh i qartë nga Bayerni: Olise nuk largohet

Zërat rreth një transferimi të mundshëm të Michael Olise nga Bayern Munich te Real Madridi janë hedhur poshtë me forcë nga shoku i tij i skuadrës dhe kombëtares franceze, Dayot Upamecano. Mesfushori i krahut, i cili ka shkëlqyer me Bayernin, ka qenë në qendër të spekulimeve të merkato, veçanërisht pas raportimeve për një ofertë marramendëse nga gjigandi spanjoll.

Sipas informacioneve të qarkulluara, Real Madridi ishte gati të paraqiste një ofertë prej 223 milionë eurosh për shërbimet e 24-vjeçarit, një shifër që do të thyente rekordet e transferimeve. Këto spekulime u intensifikuan gjatë grumbullimit të kombëtares franceze për Kupën e Botës 2026, duke ngritur pyetje mbi të ardhmen e Olises në Bundesligë.

Megjithatë, përgjigja e Upamecanos ishte e prerë dhe nuk la vend për dyshime. I pyetur nga gazetarët gjatë grumbullimit me kombëtaren, mbrojtësi francez u shpreh shkurt, por me vendosmëri: "Ai qëndron këtu, ai qëndron këtu!" Kjo deklaratë interpretohet si një mesazh i qartë se Bayern Munich nuk ka ndërmend të heqë dorë nga një prej lojtarëve kyç të skuadrës së tij.

Olise ka qenë një nga elementët më të rëndësishëm në formën e mirë të Bayernit kohët e fundit, duke tërhequr vëmendjen e klubeve më të mëdha evropiane me paraqitjet e tij mbresëlënëse. Kjo është shkaku kryesor i interesimit të Real Madridit, i cili po kërkon të forcojë sulmin e tij me talente të rinj dhe cilësorë.

Në të shkuarën, edhe ish-sulmuesi i Francës, Louis Saha, komentoi mbi këto spekulime. Ai vlerësoi ngritjen e shpejtë të Olises si lojtar, duke pranuar se shifrat e përfolura për transferimin e tij janë vërtet të jashtëzakonshme. Por, pavarësisht interesimit të madh dhe shifrave, fjala e Upamecanos sugjeron se ylli francez do të vazhdojë karrierën e tij në Allianz Arena.