Rusia mund të jetë gati të sulmojë NATO-n deri në vitin 2029

Të 32 vendet anëtare të NATO-s ndajnë vlerësimin se Rusia mund të jetë në gjendje të sulmojë një vend të aleancës deri në vitin 2029, ose edhe më herët.

Paralajmërimi vjen nga gjeneral-lejtnanti gjerman Christian Freuding, i cili deklaroi se ky nuk është një vlerësim i veçantë i Berlinit, por një përfundim i përbashkët i bazuar në informacionet e inteligjencës të ndara mes të gjitha vendeve anëtare të NATO-s. “Duhet të jemi gati për të luftuar”, tha Freuding gjatë Panairit Ndërkombëtar të Aviacionit ILA në Berlin. “Ky nuk është një vlerësim gjerman. Është inteligjencë e koordinuar nga NATO. Të 32 partnerët e aleancës bien dakord se Rusia mund të ketë aftësinë për të pushtuar një vend anëtar të NATO-s në vitin 2029”, shtoi ai. Deklaratat vijnë në një kohë kur lufta në Ukrainë vazhdon prej më shumë se katër vitesh, ndërsa vendet perëndimore po monitorojnë nga afër aftësinë e Rusisë për të rindërtuar kapacitetet e saj ushtarake. Sipas zyrtarëve të sigurisë, pavarësisht humbjeve të mëdha në njerëz dhe pajisje gjatë luftës në Ukrainë, Moska vazhdon të investojë në industrinë e mbrojtjes dhe në modernizimin e forcave të armatosura.

Freuding theksoi se Gjermania po përshpejton programet e prokurimit ushtarak dhe zgjerimin e kapaciteteve industriale të mbrojtjes, por paralajmëroi se projektet afatgjata nuk janë të mjaftueshme përballë kërcënimeve aktuale. “Koha është thelbësore”, tha ai, duke kërkuar zgjidhje të ndërmjetme për të mbushur boshllëqet ekzistuese në aftësitë ushtarake. Rajoni i Baltikut mbetet një nga pikat kryesore të shqetësimit për NATO-n. Aleanca ka zhvilluar muajt e fundit disa stërvitje që simulojnë pikërisht një skenar të mundshëm sulmi rus ndaj një vendi anëtar. Në muajin maj, qindra ushtarakë nga vendet e NATO-s morën pjesë në stërvitjen “Arrcade Strike” në Londër, ku u testua koordinimi i një force prej deri në 100 mijë trupash. Skenari i ushtrimit parashikonte mbrojtjen e Estonisë nga një pushtim rus në vitin 2030 dhe aktivizimin e Nenit 5 të NATO-s pas një inkursioni të simuluar në territorin baltik./Dukagjini/